Elva: Ég veit ekki hvað gerðist

„Þetta er gríðarlega sárt, við komumst 2-0 yfir og við höldum sjálftrausti þrátt fyrir að fá á okkur mark fljótlega. Þetta gekk bara ekki í dag, við hættum eiginlega bara eftir annað markið og seinni hálfleikurinn var virkilega dapur," sagði Elva Friðjónsdótti, leikmaður Þórs/KA svekkt eftir 3-2 tap gegn Breiðablik í kvöld. Þór/KA komust 2-0 yfir og voru manni fleiri í 70 mínútur en náðu ekki að nýta sér liðsmuninn og svo fór að Breiðabliksstelpur fóru með sigur af hólmi. „Ég veit ekki hvað gerðist, hvort það megi skrifa þetta á reynsluleysi veit ég ekki en það gekk bara ekkert upp hjá okkur." Með þessum leik færðist Þór/KA niður í þriðja sæti og tóku Blikastúlkur sæti þeirra í öðru sæti. Einnig misstu þær tækifæri í að halda í Valsstúlkur sem eru komnar með gott pláss á toppnum og virðast stefna hraðbyri á annan meistaratitil. „Við fórum inn í mótið með það markmið að gera betur en í fyrra, við lentum í þriðja sæti í fyrra þannig við leggjum núna upp með að ná öðru sætinu aftur. Valsstúlkur eru með gríðarlega sterkt lið og það er erfitt að sjá annað lið taka titilinn úr þessu" sagði Elva.