Frost leysir frá skjóðunni

Breska leikkonan Sadie Frost gaf nýverið út sjálfsævisögu sína og fjallar meðal annars um hjónaband sitt og leikarans Jude Law. Frost var gift kona þegar hún kynntist Law við tökur á kvikmynd.

Sadie Frost og Jude Law giftu sig árið 1997 og eiga þau saman þrjú börn. Í nýrri bók sinni minnist Frost tímanna með Law og segist hafa heillast af honum við fyrstu sýn.

„Ég brosti til hans og hann brosti til baka feimnislega. Ég var tuttugu og fimm ára, gift kona og átti lítið barn. Hann var grannvaxinn og slánalegur og aðeins nítján ára gamall, en eitthvað við hann gerði mig óörugga og ég roðnaði." Svona lýsir Frost fyrstu kynnum sínum og Law og segist hún hafa vitað þá þegar að hún ætti eftir að eyða lífi sínu með þessum unga manni.

Frost var gift tónlistarmanninum Gary Kemp, úr hljómsveitinni Spandau Ballet, og voru þau farin að rífast mikið þegar hér var komið til sögu. „Eftir því sem hrifning mín á Jude varð meiri, því meira varð samviskubitið. Ég átti hið fullkomna líf en mér fannst sem ég þyrfti að eyðileggja það áður en einhver annar yrði á undan mér til þess."

Frost og Law voru óskapar bresku þjóðarinnar strax frá upphafi og var mikið fjallað um samband þeirra. Ævintýrið entist þó ekki að eilífu og skildi parið árið 2003, stuttu eftir frí á Tælandi. „Ég vissi að sambandinu var lokið. Ég var of létt, þunglynd og hrædd og ég vissi að hann elskaði mig ekki lengur."