Tiger svaraði spurningum aðdáenda á Twitter

Tiger Woods hefur unnið yfirvinnu síðustu mánuði til þess að laga ímynd sína og hann er hvergi nærri hættur. Kappinn er nú mættur á Twitter-samskiptasíðuna þar sem hann virðist ætla að vera öflugur.

Það eru aðeins tvær vikur síðan Tiger mætti til leiks á Twitter og síðasta þriðjudag tók hann sér klukkutíma í að svara spurningum aðdáenda.

"Hvað er að frétta gott fólk? Ákvað loksins að prófa Twitter," sagði Tiger í sinni fyrstu færslu á síðunni fyrir tveim vikum.

Tiger svaraði einum 23 spurningum á Twitter og þar kom fram að uppáhaldsvöllurinn hans væri St. Andrews og að hann myndi vera í körfubolta ef hann væri ekki í golfi.