Pennant í vandræðum hjá Zaragoza - má ekki æfa með liðinu

Vandræðagemsinn Jermaine Pennant hjá Real Zaragoza er kominn í ónáð hjá knattspyrnustjóra spænska félagsins eftir að hafa mætt þrisvar sinnum alltof seint á æfingar á síðustu tveimur vikum.

Pennant hefur í kjölfarið verið settur í bann frá æfingum á meðan hann lærir lexíu sína auk þess sem hann verður sektaður af félaginu. Vandræði Pennant eru þó aldrei þessu vant ekki bara utan vallar því hann hefur heldur ekki þótt gera neinar rósir innan vallar í spænsku deildinni eftir félagaskipti sín til Zaragoza frá Liverpool í sumar.

Pennant var iðinn við kolann þegar hann var á Englandi að koma sér í alls kyns vandræði utan vallar. Pennant ólst upp í miklu glæpahverfi í Nottingham á Englandi og hefur oft talað um í viðtölum að fótboltinn hafi bjargað sér frá lífi á glæpabrautinni.

Hann hefur þó ekki alveg komist hjá því að brjóta lögin og er sennilega einna þekktastur í seinni tíð fyrir að hafa spilað leik árið 2005 með sérstaka ól með rafrænu staðsetningartæki um ökklan eins og fyrrum fangar þurfa gjarnan að nota þar sem hann var á skilorði fyrir að hafa keyrt fullur.

Pennant missti ökuleyfið fyrst í 16 mánuði fyrir að keyra fullur á móti umferð í Paddington í London árið 2004 og ári síðar var hann aftur tekinn fullur eftir að hafa klessukeyrt Mercedes Benz glæsibifreið sína í Aylesbury í Buckinghamshire.

Þegar hann var gripinn í seinna skiptið reyndi hann að villa á sér heimildir við yfirheyrslu og sagðist heita Ashley Cole, sem var þáverandi liðsfélagi hans hjá Arsenal. Pennant þurfti síðar að dvelja í þrjá mánuði í fangelsi fyrir gjörðir sínar.