Adebayor vill fá Balotelli til City

Emmanuel Adebayor segist gjarnan vilja spila við hlið Mario Balotelli hjá Manchester City.

Balotelli er á mála hjá Inter á Ítalíu en hefur verið sterklega orðaður við City að undanförnu. Talið er líklegt að kaupin muni ganga í gegn á næstu dögum.

„Ég hef fengið tækifæri til að spila með mörgum frábærum framherjum og það eru allir velkomnir hér," sagði Adeabyor. „Við myndum gera allt í okkar valdi til að hjálpa viðkomandi að aðlagast enska boltanum."

„Balotelli er fæddur í Gana en spilar fyrir ítalska landsliðið. Ég er sjálfur afrískur og það verður því mjög ánægjulegt að hitta hann. Það væri gott að fá hann en aðalmálið er að fá leikmenn sem geta hjálpað liðinu að vinna titla."