Juventus vann AC Milan og Totti fékk rautt í sigri Roma

Juventus vann 2-1 útisigur á AC Milan í ítölsku A-deildinni í kvöld og er nú aðeins tveimur situgm á eftir AC Milan í 4. sæti deildarinnar. Roma vann 2-0 sigur á Lecce í hinum leik dagsins en Francesco Totti, fyrirliði Roma, fékk að líta rauða spjaldið þrettán mínútum fyrir leikslok.

Fabio Quagliarella og Alessandro Del Piero komu Juventus í 2-0 á San Siro áður en Zlatan Ibrahimovic minnkaði muninn átta mínútum fyrir leikslok.

Nicolás Burdisso og Mirko Vucinic skoruðu mörk Roma í seinni hálfleik í sigrinum á Lecce en Roma er í 7. sætinu eftir leikinn. Vandræði fyrirliðans settu þó skugga á sigurinn.

Francesco Totti lenti saman við Ruben Olivera, leikmann Lecce, í aðdraganda seinna marksins og þeir voru báðir reknir útaf. Totti var ekki hættur því hann hljóp á eftir Olivera og virtist ætla gera út um málin á bak við tjöldin.

Totti missir af nágrannaslagnum við Lazio um næstu helgi en hann gæti einnig fengið lengra bann vegna hegðunnar sinnar eftir að hann var rekinn af velli.