Guðmundur Hólmar fer ekki í leikbann

HSÍ hefur staðfest að Guðmundur Hólmar Helgason, leikmaður Akureyrar, muni ekki fara í leikbann vegna rauða spjaldsins sem hann fékk í leiknum gegn FH í gær.

Dómarar leiksins, Anton Gylfi Pálsson og Hlynur Leifsson, mátu það svo eftir leikinn að brotið félli ekki undir þá skilgreiningu að Guðmundur hefði hindrað að andstæðingurinn fengi upplagt marktækifæri og hefði beitt grófri óíþróttamannslegri hegðun.

Ef þeir hefðu gert það hefðu þeir skilað inn svokallaðri agaskýrslu um atvikið. Það hefði þýtt sjálfkrafa bann.

Anton og Hlynur höfðu til klukkan níu í morgun til að skila skýrslunni en ákváðu eftir að hafa skoðað atvikið nánar að sleppa því að skila inn skýrslunni.

Guðmundur Hólmar sleppur því með skrekkinn og er löglegur í næsta leik liðanna á föstudag.