Fylkir vann KR - ÍBV marði Grindavík

Heil umferð fór fram í Pepsi-deild kvenna í knattspyrnu í dag. Helst bar til tíðinda sigur Fylkis á KR í sex stiga leik í Vesturbænum. Þá lenti ÍBV í basli með Grindavík en hafði að lokum sigur.

KR og Fylkir voru bæði með sjö stig fyrir leik liðanna í gærkvöldi og því mikið undir. Anna Björg Björnsdóttir skoraði eina mark leiksins tæpum tíu mínútum fyrir leikslok. Fylkir fer upp í 5. sætið með sigrinum og hefur þriggja stiga forskot á Breiðablik og KR.

Valskonur eru enn ósigraðar í deildinni en þær sóttu Þróttara heim í Laugardalinn. Elín Metta Jensdóttir, Caitlin Miskel og Mist Edvardsdóttir skoruðu mörk Íslandsmeistaranna í 3-1 sigri. Margrét María Hólmarsdóttir skoraði mark Þróttar. Valur heldur eins stigs forystu á toppi deildarinnar.

Í Mosfellsbænum fór Stjarnan létt með Mosfellinga 4-0. Þær Soffía Arnþrúður Gunnarsdóttir og Ásgerður Stefanía Baldursdóttir komu Garðbæingum yfir í fyrri hálfleik. Í þeim síðari bættu Ashley Bares og Hugrún Elvarsdóttir við mörkum og öruggur sigur í höfn. Stjarnan heldur í við Valskonur og munar áfram einu stigi á liðunum.

Í Eyjum leit lengi vel allt út fyrir fyrsta sigur Grindavíkur í sumar. Sarah Wilson kom þeim gulklæddu yfir í upphafi síðari hálfleiks. Berglind Björg Þorvaldsdóttir kom sínu liði til bjargar með tveimur mörkum á síðustu fimm mínútunum og tryggði 2-1 sigur. ÍBV heldur því þriðja sætinu, þremur stigum á eftir Val og tveimur á eftir Stjörnunni.

Fyrr í dag vann Þór/KA góðan sigur á Blikastelpum 4-2. Fjallað var um leikinn fyrr í dag hér á Vísi.

Upplýsingar um markaskorara eru að hluta fengnar frá vefsíðunni Fótbolti.net.