Rory fékk fimm ára keppnisrétt á PGA mótaröðinni

Með sigrinum á opna bandaríska meistaramótinu í golfi tryggði Norður-Írinn Rory McIlroy sér keppnisrétt á bandarísku PGA mótaröðinni næstu fimm árin. McIlroy reyndi fyrir sér á bandarísku PGA mótaröðinni í fyrra en ákvað að einbeita sér eingöngu að Evrópumótaröðinni fyrir þetta tímabil – en McIlroy leiddist einfaldlega lífið í Bandaríkjunum  á meðan hann var þar.

Andrew Chandler umboðsmaður McIlroy segir að kylfingurinn muni leika á fleiri mótum á PGA mótaröðinni en upphaflega var gert ráð fyrir. „Það verða ekki 15 mót á dagskrá hjá honum, það er of mikið,“ segir Chandler en hann er einnig umboðsmaður Louis Oosthuizen og Charl Schwartzel sem eru báðir frá Suður-Afríku. Chandler hefur hitt á naglann hvað varðar viðskiptavini því Oosthuizen sigraði á opna breska meistaramótinu í fyrra og Schwartzel fékk græna jakkann í fyrsta sinn á ferlinum eftir sigurinn á Augusta vellinum í apríl. 

Oosthuizen og Schwartzel eru báðir á PGA mótaröðinni en McIlroy lék á 16 mótum á síðasta tímabili í Bandaríkjunum. Hann ákvað að því loknu að skila inn keppnisleyfi sínu og einbeita sér að Evrópumótaröðinni.

Englendingurinn Lee Westwood er einnig með Chandler sem umboðsmann og Westwood tók sömu ákvörðun og McIlroy síðasta haust þegar hann skilaði inn keppnisleyfi sínu á PGA mótaröðinni. Westwood er því  með Evrópumótaröðina í forgangi.