Frank Rost til New York Red Bulls

Þýski markvörðurinn Frank Rost er á leið til New York Red Bulls í bandarísku atvinnumannadeildinni í knattspyrnu. Þýska blaðið Bild greinir frá þessu. Rost er 38 ára gamall og hefur spilað í Bundesligunni í 18 ár.

Rost hefur undanfarin ár leikið með Hamburg SV en þar áður lék hann lengi með Werder Bremen og Schalke. Hann á að baki fjóra landsleiki fyrir Þýskaland.

„Við erum mjög spennt yfir því að Frank hafi ákveðið að ganga til liðs við okkur á miðju tímabili,“ sagði Erik Soler yfirmaður knattspyrnumála hjá Red Bulls.

Eiður Smári Guðjohnsen hefur verið orðaður við félagið að undanförnu.