Krkic: Guardiola er ekki besti þjálfari heims

Spænski unglingalandsliðsmaðurinn Bojan Krkic vandar fyrrum þjálfara sínum, Pep Guardiola, ekki kveðjurnar en hann var í gær seldur frá Barcelona til Roma.

Krkic fékk afar fá tækifæri á síðustu leiktíð en mun fá að spila meira hjá Roma þar sem Luis Enrique er við stjórnvölinn.

"Í augum stuðningsmannanna er Pep Guardiola besti þjálfari heims en mín persónulega reynsla af þjálfaranum er slæm. Ýmislegt sem gekk á milli okkar særði mig þannig að ég get seint sagt að hann sé besti þjálfari heims," sagði Krkic.

"Hann var ekki alltaf sanngjarn við mig og það er ein ástæðan fyrir því af hverju ég ákvað að fara. Við höfum ekki rætt saman síðan eftir úrslitaleik Meistaradeildarinnar. Ég tók þá ákvörðun að hætta að tala við hann," sagði Krkic en hann kom ekkert við sögu í leiknum.

"Það særði mig mikið að fá ekki að taka þátt í þeim leik enda í annað sinn sem það gerist."