Börsen: Engin leið framhjá grísku gjaldþroti

Það virðist órökrétt en björgun gríska hagkerfisins krefst þess að Grikkland verði gjaldþrota. Það er í fyrsta sinn í sögunni sem ESB-land lendir í slíku.

Þannig hefst frétt á vefsíðu börsen í morgun þar sem segir að björgunaráætlunin sem leiðtogar evrusvæðisins samþykktu í gærdag hafi fengið markaðina til að anda léttar. Hinsvegar felur áætlunin í sér að almennir fjárfestar komast ekki hjá tapi og þar með verður ekki hjá því komist að Grikkland lendi í takmörkuðu gjaldþroti (selective default) eða takmarkaðri greiðslustöðvun.

Það sem veldur þessu er að í björgunaráætluninni er gert ráð fyrir að lengja í lánum Grikkja, lækka vexti  og endurkaupa af þeim ríkisskuldabréf en þetta mun létta stöðuna um 50 milljarða evra. Á meðan á þessum skiptum á fyrri ríkisskuldabréfum fyrir ný stendur verða Grikkir í greiðslustöðvun en reikna má með að allt ferlið taki töluverðan tíma.

Eins og áður hefur komið fram hafa stóru matsfyrirtækin þrjú, Moody´s, Standard & Poor´s og Fitch Ratings, sagt að Þau muni lækka lánshæfiseinkunn Grikklands niður í D eða gjaldþrot ef skuldir landsins verða endurskipulagðar eins og nú hefur verið ákveðið að gera.

Hættan við greiðslustöðvun er sú að skuldabréf viðkomandi lands verða þar með verðlaus. Þetta getur sent fjármálakerfi viðkomandi lands á hliðina, þótt um stýrt ferli sé að ræða eins og í tilfelli Grikklands, að því er segir á börsen.

Fastlega er búist við að evrópski seðlabankinn muni gera undantekningu hvað varðar grísk ríkisskuldabréf og taka þau sem veðhæf þrátt fyrir að lánshæfiseinkunn landsins verði lækkuð niður í D.

Takmarkað gjaldþrot Grikklands mun koma verst niður á frönskum og þýskum bönkum. Franskir banka liggja nú með tæpa 57 milljarða evra í grískum skuldabréfum og þýskir bankar halda á um 34 milljörðuim evra af slíkum bréfum.