Vextir á grískum skuldabréfum yfir 40%

Ávöxtunarkrafan á grískum ríkisskuldabréfum til tveggja ára fór yfir 40% í morgun. Svo há krafa hefur ekki áður sést á grískum skuldabréfum. Þegar leið á morguninn lækkaði þessi krafa aðeins og stendur nú í kringum 38%.

Á morgun fimmtudag er það sem margir kalla örlagadagur evrunnar en þá hittast leiðtogar ESB til að ræða aðgerðir gegn skuldakreppunni á evrusvæðinu.  Ekki er búist við að mikill árangur verði af þeim fundi.

Angela Merkel kanslari Þýskalands lét á sér skilja í gærdag að skuldakreppan verði ekki leyst í einu höggi. Þetta skilja menn sem svo að leiðtogarnir hafi ekki komið sér saman um aðgerðir.

Mesta hættan nú er talin að gríska skuldakreppan smiti út frá sér til Ítalíu og Spánar. Vextir á ríkisskuldabréfum þessara landa hreyfðust þó nær ekkert í morgun.