Stjörnukonur Íslandsmeistarar - Valur felldi Þrótt

Stjörnukonur unnu í kvöld fyrsta Íslandsmeistaratitilinn í sögu félagsins í meistaraflokki karla og kvenna í fótbolta með því að vinna 3-0 sigur á Aftureldingu í 16. umferð Pepsi-deildar kvenna. Stjarnan þurfti bara einn sigur í síðustu þremur umferðunum en með þessum sigri er ljóst að Valskonur geta ekki náð Stjörnunni að stigum.

Stjarnan er með sjö stiga forystu á Val þegar aðeins tvær umferðir eru eftir en liðið er búið að ná í 45 af 48 mögulegum stigum í Pepsi-deildinni í sumar. Stjarnan vann þarna sinn þrettánda leik í röð í deildinni en þær hafa unnið unnu alla leiki sína frá því að liðið tapaði 2-1 fyrir Val á Hlíðarenda í lok maí.

Valskonur voru búnar að vinna Íslandsmeistaratitilinn fimm ár í röð og gerðu sitt með því að vinna 5-0 sigur á Þrótti á Vodafone-vellinum. Þróttur er þar með fallið úr Pepsi-deildinni en liðið kom upp í deildina síðasta haust.

Stjarnan varð að vinna til þess að tryggja sér titilinn og þær komust yfir þegar Harpa Þorsteinsdóttir fékk vítaspyrnu á upphafsmínútum seinni hálfleiks. Ásgerður Baldursdóttir steig fram og skoraði af öryggi úr vítinu. Ashley Bares og Inga Birna Friðjónsdóttir innsigluðu síðan sigurinn í lokin.

Upplýsingar um markaskorara eru að hluta til fengnar frá vefsíðunni fótbolti.net.

Úrslit og markaskorarar í leikjunum í kvöld:

Þór/KA-Breiðablik 3-1

1-0 Arna Sif Ásgrímsdóttir (2.), 2-0 Lára Einarsdóttir (47.), 2-1 Fanndís Friðriksdóttir, víti (51.), 3-1 Arna Sif Ásgrímsdóttir (90.)

Grindavík-ÍBV 0-4

0-1 Berglind Björg Þorvaldsdóttir (16.), 0-2 Danka Podovac (36.), 0-3 Vesna Smiljkovic (39.), 0-4 Berglind Björg Þorvaldsdóttir (58.)

Fylkir-KR 4-1

1-0 Hrafnhildur Hekla Eiríksdóttir (11.), 1-1 Berglind Bjarnadóttir (28.), 2-1 Anna Björg Björnsdóttir (33.), 3-1 Lidija Stojkanovic (65.), 4-1 Fjóla Dröfn Friðriksdóttir (72.)

Valur-Þróttur 5-0

1-0 Laufey Ólafsdóttir (15.), 2-0 Rakel Logadóttir (16.), 3-0 Rakel Logadóttir (45.), 4-0 Mist Edvardsdóttir (48.), 5-0 Málfríður Erna Sigurðardóttir (90.+3)

Stjarnan-Afturelding 3-0

1-0 Ásgerður Stefanía Baldursdóttir, víti (48.), 2-0 Ashley Bares (88.), 3-0 Inga Birna Friðjónsdóttir (90.+2)