Amanda Knox sýknuð

Hin bandaríska Amanda Knox, sem var dæmd í 25 ára fangelsi fyrir að hafa orðið meðleigjanda sínum að bana á Ítalíu árið 2007, var rétt í þessu sýknuð af ítölskum áfrýjunardómstól.

Þegar hún kom fyrir dómara var hún föl og greinilega mjög kvíðin. Þegar dómari tjáði henni svo að hún yrði sýknuð brast hún í grát og faðmaði verjanda sinn. Þetta var mjög tilfinningaþrungin stund í dómsalnum.

Hún verður látin laus úr haldi eftir tvo klukkutíma og mun þá snúa heim til Bandaríkjanna.

Hún hefur beðið í allan dag eftir niðurstöðunni. Í morgun barðist hún við að halda tárunum í skefjum þegar hún ávarpaði réttinn á lýtalausri ítölsku í, rétt áður en dómstóllinn tók sér hlé til að ákvarða hvort hún og fyrrverandi elskhugi hennar, Raffaele Sollecito, væru sek um morðið á bresku skólastúlkunni Meredith Kercher.

Knox hefur ávallt haldið fram sakleysi sínu og það gerði hún einnig í morgun.

Í morgun sagðist hún bæði hafa misst vin og alla trú á ítölsku lögreglunni og að henni hafi verið refsað í fjögur ár fyrir eitthvað sem hún gerði ekki. Það sem vó þyngst í þessu máli er að ný gögn litu dagsins ljós, en sérfræðingar voru kallaðir til í því skyni að leggja mat á rannsókn ítölsku lögreglunnar á morðinu.

Lögfræðingur Knox benti meðal annars á að skítugir hanskar voru notaðir til að safna sönnunargögnum.

Áfrýjunardómstóllinn kvað upp úrskurðinn sinn núna í kvöld. Knox og Sollecito eiga rétt á skaðabótum frá ítalska ríkinu upp á allt að 80 milljónir íslenskra króna. Mál Knox hefur vakið heimsathygli en sjónvarpsmynd, sem byggð er á sögu hennar, hefur þegar verið gefin út.