Verður stærsta kauphöll heims

Stjórnendur NYSE Euronext-kauphallarsamstæðunnar og Deutsche Börse, þýsku kauphallarinnar, greindu frá því í gær að samrunaviðræður væru í gangi. Skili þær tilætluðum árangri verður til stærsti hlutabréfamarkaður í heimi.

Tilkynnt var um viðræðurnar í kjölfar þess að lokað var tímabundið við viðskipti með hlutabréf kauphallanna. Skömmu áður höfðu kauphöllin í Toronto í Kanada og breski hlutabréfamarkaðurinn í London greint frá fyrirhuguðu samstarfi sínu.

NYSE Euronext rekur kauphöllina í New York í Bandaríkjunum og fjórar í jafn mörgum löndum á meginlandi Evrópu.

Undir kauphöllina í Þýskalandi heyrir sömuleiðis helmingshlutur í Eurex-verðbréfamarkaðnum í Evrópu. Markaðsverðmæti þýska markaðarins er jafnvirði tæpra ellefu milljarða Bandaríkjadala, sem er um tæpum tveimur milljörðum meira en verðmæti NYSE Euronext.

Bandaríska stórblaðið Washington Post segir stefnt að því að Duncan Niederauer, forstjóri NYSE Euronext, verði yfir sameinaðri kauphöll, en Reto Francioni, forstjóri þýsku kauphallarinnar, setjist í stól stjórnarformanns. - jab