Bretar vilja frysta eigur Mubaraks

Skorað hefur verið á bresk stjórnvöld að frysta allar eigur Hosni Mubaraks, fyrrverandi forseta Egyptalands, sem hann á í Bretlandi.

Breski fréttavefurinn Daily Mail segir að efnahagsbrotadeild bresku lögreglunnar, The Serious Fraud Office, leiti nú að miklum verðmætum sem Mubarak og fjölskylda hans komu út úr Egyptalandi í tíð þrjátíu ára ógnarstjórnar Mubaraks. Talið er að eignir Mubaraks nemi um 8300 milljörðum íslenskra króna. Stór hluti þeirra eigna er geymdur í breskum og svissneskum bönkum og í fasteignum í Lundúnum, París, New York, Dubai og hluta Egyptalands.

Talsmaður bresku efnahagsbrotadeildarinnar segir í samtali við Daily Mail að mjög líklegt sé að stór hluti eignanna sé í Bretlandi, en ekki sé vitað hve miklar eignir það eru. Svissnesk stjórnvöld tilkynntu að eignir Mubaraks hefðu verið frystar einungis örfáum klukkustundum eftir að hann sagði af sér embætti.