Barcelona kom fram hefndum

Barcelona vann í kvöld 3-0 sigur á Hercules í spænsku úrvalsdeildinni í knattspyrnu.

Þar með hefndi liðið fyrir eina tap sitt á tímabilinu til þessa í spænsku úrvalsdeildinni en Hercules vann afar óvæntan 2-0 sigur á Börsungum á Nou Camp í upphafi september.

Pedro skoraði fyrsta mark Barcelona á 43. mínútu en Lionel Messi skoraði tvö á tveimur mínútum undir lok leiksins.

Farions, leikmaður Hercules, fékk að líta rauða spjaldið á 85. mínútu er hann fékk sína síðari áminningu í leiknum.

Eftir tapið í september hefur Barcelona verið á ótrúlegri siglingu og ekki tapað leik í deildinni. Reyndar hefur Barcelona unnið síðustu fimmtán deildarleiki sína.

Barcelona er á toppi deildarinnar með 58 stig af 63 mögulegum. Real Madrid er svo í öðru sæti með 51 stig en á leik til góða.