Van Gaal: Ribery og Robben eru eins og Messi og Xavi fyrir Bayern

Louis van Gaal, þjálfari Bayern Munchen, var himinlifandi með frammistöðu Hollendingsins Arjen Robben og Frakkans Franck Ribery í 4-0 stórsigri Bayern Munchen á Hoffenheim í þýsku úrvalsdeildinni í gær.

Robben skoraði tvö mörk og gaf eina stoðsendingu í leiknum og Ribery lagði upp tvö mörk. Saman fóru þeir margoft mjög illa með vörn Hoffenheim í þessum leik og það er ljóst að Bayern er allt annað lið með þá innanborðs. Robben er með 4 mörk í 4 leikjum síðan að kom til baka eftir meiðsli og Bayern hefur unnið þá þrjá síðustu með markatölunni 12-2.

„Með Robben og Ribery þá er miklu meiri sköpun í liðinu okkar. Þeir eru ótrúlega mikilvægir fyrir Bayern, alveg eins og Lionel Messi og Xavi eru fyrir Barcelona eða Cristiano Ronaldo og Mesut Ozil eru fyrir Real Madrid," sagði Louis van Gaal.

„Við erum búnir að bíða í sex mánuði eftir að þeir væru báðir heilir og tilbúnir að fara spila saman á ný," sagði van Gaal.