Sveppi fagnar Dressmann

„Þetta er alveg æðislegt því nú get ég bara farið í Dressmann og keypt mér bol," segir Sverrir Þór Sverrisson, sjónvarpsstjarna með meiru. Sverrir er mikill Rolling Stones maður en ekkert síður Stones-bolamaður og gengur helst ekki í neinu öðru.

Eins og kom fram í fjölmiðlum samdi norska fatakeðjan Dressmann við gamlingjana í Rolling Stones og nú geta íslenskir aðdáendur sveitarinnar keypt boli sveitarinnar þar. Dressmann er umtöluð og jafnvel umdeild verslun.

Sumir eru hæstánægðir með fötin þar en aðrir myndu aldrei klæðast þeim. Sverrir viðurkennir fúslega að hafa haft ýmis miður fögur orð um Dressmann en er reiðubúinn að éta þau ofan í sig. „Og ég er meira að segja kominn með bol frá þeim, vinur minn gaf mér svona „limited edition" bol. Hann á víst að vera nákvæmlega eins og bolur sem Keith Richards, gítarleikari Stones, gekk einu sinni í."

Stones-bolirnir inni í fataskáp Sverris eru í kringum tólf en nokkrir þeirra eru aðeins of litlir. „Og svo á ég líka íþróttatreyju merkta Stones. Þetta er náttúrlega bara kjánalegt," segir Sverrir og bætir því við að enginn þeirra sé í sérstöku uppáhaldi, honum þyki vænt um þá alla.

„Það er hins vegar einn sem ég sakna svolítið mikið. Og svo er einn sem ég fer bara í heima, hann er rauður og svolítið plebbalegur."- fgg