Tróðu upp í Kaupmannahöfn

„Við áttum æðislega daga í Köben. Ég átti reyndar pantað borð á Hard Rock Café en komst ekki. Svo var Tívolíið lokað en Strikið stóð fyrir sínu,“ segir Ragnar Ísleifur Bragason listamaður.

Þremur meðlimum Leikhúss listamanna var boðið til Kaupmannahafnar á dögunum til að taka þátt í sýningu Kristjáns Ingimarssonar fjöllistamanns. Sýningin ber heitið Fools of the World Unite og fjallar um það að finna fíflið innra með sér, sleppa því lausu og gera sig að fífli.

Ingibjörg Magnadóttir, Ragnar Ísleifur Bragason og Snorri Ásmundsson dvöldu í viku í Kaupmannahöfn og unnu með Kristjáni. Hann gaf þeim lausan tauminn í spuna og leyfði þeim að taka þátt í síðustu fjórum sýningunum á verkinu. „Við fengum að taka þátt í þessari uppreisn hans. Honum finnst eitthvað bogið við samfélagið og vill að fólk finni fíflið inni í sér og sleppi því lausu,“ segir Ragnar.

Ragnar flutti meðal annars ljóð sitt sem hann og Kristján snöruðu yfir á dönsku.

„Þetta var frekar persónulegt ljóð. Daninn vissi ekki hvernig hann ætti að bregðast við þessum íslenska rauðhaus og fór bara að hlæja að mér. Ég kunni alveg að meta það og þetta var skemmtilega vandræðalegt.“

Næstsíðasta skemmtikvöld Leikhúss listamanna verður í Þjóðleikhúskjallaranum í kvöld klukkan 21. Á dagskránni eru nokkrir gjörningar, til að mynda frá Ásdísi Sif Gunnarsdóttur, Ingibjörgu Magnadóttur og Söru Björnsdóttur en kynnir er sem fyrr Ármann Reynisson vinjettuhöfundur.

Þá treður Pittsburgh-búinn Nathan Hall upp með bjölluspili og söng og Ragnar flytur áðurnefnt ljóð sitt.- hdm