Kexverksmiðjan vaknar til lífsins

Mikla athygli vakti þegar greint var frá því að nokkrir gamlir vinir og kunningjar hefðu leigt gömlu kexverksmiðjuna Frón og hyggðust opna þar gistiheimili. Um helgina voru síðan dyrnar opnaðar.

Kex Hostel er með gistiaðstöðu fyrir 150 manns og hyggst bjóða upp á ódýra gistingu fyrir erlenda og íslenska ferðamenn. Eigendur gistiheimilisins eru þeir Pétur Marteinsson, fyrrum landsliðsmaður í knattspyrnu, Dagur Sigurðsson, margreynd handboltakempa, Eiður Smári Guðjohnsen, leikmaður Fullham, Hermann Hreiðarsson, leikmaður Portsmouth og athafnamaðurinn Kristinn Vilbergsson.

„Við vildum athuga hvort það væri ekki hægt að bjarga þessu húsi frá því að vera rifið, enda staðsetningin frábær," sagði Pétur í samtali við Fréttablaðið fyrir tæpu hálfu ári síðan. Þá var hann á fullu í vinnugallanum að rífa út úr húsinu og gera allt klárt.

Gistiheimilið hefur þegar vakið nokkra athygli út fyrir landsteinana og fjallað hefur verið um það í erlendum ferðamannabæklingum og vefsíðum. Þá hefur verið gert töluvert úr eignarhlut Eiðs Smára og Hermanns Hreiðarssonar. Þeir tveir voru þó víðsfjarri um helgina þegar gistiheimilið var opnað með pompi og prakt. -fgg