Vildi meira

Kimberly Stewart eignaðist dóttur í vikunni og hlaut hún nafnið Delilah. Þótt Stewart og barnsfaðirinn, leikarinn Benicio del Toro, séu ekki í sambandi mun hún vera afskaplega hrifin af honum.

„Þau tala reglulega saman vegna barnsins en það er engin rómantík á milli þeirra, Kim til mikillar mæðu. Samband þeirra var stutt og varð aldrei alvarlegt áður en hún varð ólétt," var haft eftir innanbúðarmanni.

Samkvæmt heimildum var fæðingin erfið en móður og barni heilsast vel. „Þetta var erfið fæðing en Kim er hörð af sér," sagði heimildarmaður.