Gillz tekur upp í sólinni

Egill Gillzenegger og leikstjórinn Hannes Halldórsson eru á leiðinni til Spánar þar sem tökur á nýrri sjónvarpsþáttaröð hefjast. Blikinn Egill ber mikla virðingu fyrir KR-ingnum Hannesi.

Tökur á annarri þáttaröð Egils Einarssonar, Lífsleikni Gillz, hefjast á mánudag eftir rúma viku við strendur sólarparadísarinnar Benidorm. Þar ætlar kraftajötunninn að kenna samlöndum sínum hvernig á að haga sér eins og sannur heimsborgari. „Alveg svakalega ömurlegt að þurfa að fara í sex daga vinnuferð í sólina á Spáni,“ segir Egill og stráir salti í sár þeirra sem þurfa að húka í haustlægðunum hér.

Mannasiða-þáttaröðin sló eftirminnilega í gegn í fyrra en þar fór Egill í gegnum það hvernig svokallaðir „rasshausar“ geta látið af hegðun sinni. Kennslan mun halda áfram í næstu þáttaröð en þó verður bryddað upp á einhverri nýbreytni. „Rasshausarnir“ verða þó á sínum stað og meðal þeirra sem aðstandendur þáttanna hafa rætt við eru Þorsteinn Guðmundsson, Pétur Jóhann Sigfússon og Gunnar Hansson. Að sögn Egils er líklegt að Þorsteinn fari með í sólina og hann lofar því að kenna áhorfendum hvernig þeir geti verið alvöru heimsborgarar.

Og þótt Egill sé yfirleitt kokhraustur karl beygir hann sig og hneigir fyrir leikstjóra þáttanna, sjálfum Hannesi Halldórssyni. „Það er ekkert annað hægt, hann er tvöfaldur meistari með KR, er að fara að spila við Ronaldo með íslenska landsliðinu á föstudaginn eftir viku og þykir síðan líklegur kandídat í að verða valinn besti leikmaður ársins,“ segir Egill og bætir því við að ofan á allt sé hann einn efnilegasti leikstjóri þjóðarinnar.

freyrgigja@frettabladid.is