Fer fram á helming eigna eiginmannsins

Eiginkona körfuknattleikmannsins Kobe Bryant hefur sótt um skilnað frá íþróttastjörnunni eftir að upp komst að hann hefur haldið stöðugt framhjá henni undanfarinn áratug. Hjónin höfðu ekki skrifað undir kaupmála fyrir brúðkaupið og því getur Vanessa Bryant farið fram á helming eigna eiginmannsins.

Vanessa Bryant mætir vel undirbúin í réttarsalinn því heilt lið einkaspæjara hefur elt Kobe á röndum undanfarið ár og safnað sönnunargögnum um framhjáhald hans.

„Vanessa telur að hann hafi átt í sambandi við tíu mismunandi konur hvert ár sem þau voru gift og því gæti tala ástkvenna hans verið allt að 105 konur. Hún er harmi slegin og trúir vart að hann hafi logið svona að henni. Í hvert sinn sem upp um hann komst lofaði hann betrumbótum en sveik þau loforð jafnóðum," var haft eftir heimildarmanni.

Fái Vanessa helming eigna hans getur hún endað með 36 milljarða eftir skilnaðinn.