Óvænt tap hjá Real Madrid gegn Osasuna

Real Madrid missteig sig illa í titilbaráttunni í kvöld þegar liðið beið lægri hlut fyrir Osasuna í spænsku deildinni. Javier Camuñas skoraði eina mark leiksins á 62. mínútu og kom Osasuna upp úr fallsæti.

Madrid er í öðru sæti deildarinnar með 51 stig og er nú sjö stigum á eftir Barcelona sem er á toppnum. Nú er ljóst að Madridingar þurfa að treysta á að Barcelona misstigi sig einnig en liðið vann 15 leikinn í röð í deildinni með sigri á Hércules í gær. Emmanuel Adebayor lék sinn fyrsta leik fyrir Madrid í kvöld en hann kom að láni frá Manchester City í vikunni.

Atletico Madrid mætti Atletic Bilbao í dag og fagnaði Bilbao góðum útisigri. Gaizka Toquero skoraði bæði mörkin.

Úrslit dagsins í spænska boltanum:

Atlético 0-2 Athletic Bilbao            

Osasuna 1-0 Real Madrid