Þórður Rafn: Verðlaunaféð dugar fyrir næsta móti

„Ég hef spilað einu sinni áður á 66 höggum hér á Íslandi, á meistaramóti í Grafarholti, en þar er parið 71. Ég er ánægður með hringinn en við þurfum að fá góðar aðstæður hér á landi til að ná svona skori – og aðstæðurnar voru fínar hér í Vestmannaeyjum í dag," sagði Þórður Rafn Gissurarson kylfingur úr GR eftir sigurinn á Egils Gull mótinu á Eimskipsmótaröðinni í golfi í dag.

Þórður lék frábært golf á lokahringnum, 66 högg, þar sem hann fékk alls 7 fugla (-1) en tvöfaldur skolli (+2) á 16. braut gerði það að verkum að vallarmetið Helga Dans Steinssonar, 63 högg, var ekki í hættu að þessu sinni.

„Ég setti niður mörg góð pútt og tvö þeirra voru 8-9 metrar fyrir fugli – það þarf að fá slík pútt ofaní," sagði Þórður en þetta er annar sigur hans á stigamótaröð GSÍ en hann fagnaði sínum fyrsta sigri fyrir fjórum árum á Garðavelli á Akranesi. „Það er langur tími, of langur tími."

Þórður Rafn er 24 ára gamall og hann hefur í nógu að snúast í keppnisgolfinu. Hann er að leik á EPD-mótaröðinni á meginlandi Evrópu og stefnir á úrtökumót ið fyrir Evrópumótaröðina í haust.

„Ég ætla að gefa þessu séns og sjá hvað maður kemst langt. Það var fínt að fá 80.000 kr. verðlaunafé hérna í Eyjum, það dugir fyrir keppnsigjaldinu á næsta móti sem er í Þýskalandi í þessari viku og kannski einum flugmiða. Þetta er ekkert glamúrlíf á manni sem atvinnumaður en það er þess virði að reyna og ég hvet alla unga íslenska kylfinga að skella sér í atvinnumennsku. Ég held að það séu of margir hræddir við að taka þetta skref en ég sé ekki eftir því að hafa farið þessa leið," sagði Þórður Rafn Gissurarson.