Stjörnur sækja í Sigur Rós

Sigur Rós fékk fyrr á þessu ári nokkra leikstjóra til að vinna myndbönd við lög af nýjustu plötu sinni, Valtara. Fengu leikstjórarnir frelsi við myndbandsgerðina, sem Sigur Rós kostaði, og hafa myndböndin svo komið á vefinn eitt af öðru síðan í vor.

Alls hafa ellefu myndbönd verið frumsýnd en mesta athygli vakti myndband við lagið Fjögur píanó, sem frumsýnt var í júní, þar sem Hollywood-leikarinn Shia LaBeouf fer með aðalhlutverkið og kemur meira að segja nakinn fram.

Nýverið var svo frumsýnt myndband við lagið Ekki múkk þar sem annað þekkt andlit fer með hlutverk, írski leikarinn Aidan Gillen sem þekktur er fyrir hlutverk sín í sjónvarpsþáttunum The Wire og Game of Thrones.

- áp, mþl