Studdi stelpurnar

Íslenskir knattspyrnuáhugamenn svöruðu kallinu og flykktust á þjóðarleikvanginn til að fylgjast með landsliðsstúlkunum tryggja sér sæti í Evrópukeppninni að ári.

Kaffibrúsastemning var hjá þeim rúmlega 6.500 áhorfendum sem mættu vopnaðir íslenska fánanum en aðsóknarmet á kvennaknattspyrnuleik var slegið.

Knattspyrnuhjónin og fyrrverandi landsliðsfólkið Ragna Lóa Stefánsdóttir og Hermann Hreiðarsson mættu til að styðja stúlkurnar en þau eru flutt til Íslands eftir margra ára dvöl á Englandi.

Hjónin eiga eflaust eftir að setja sinn svip á íslenska knattspyrnu næsta sumar, Ragna Lóa sem þjálfari kvennaliðs Fylkis og Hermann með ÍBV.