Slaufur fyrir stelpur og mottulausa

Fjórar stúlkur í Fjölbrautaskóla Garðabæjar hafa útbúið skemmtilegar slaufur sem líkjast yfirvaraskeggi og selja til styrktar átaki Krabbameinsfélagsins, Mottumars. Slaufurnar hafa slegið í gegn og þær íhuga nú að ráða saumakonu til að anna eftirspurn.

„Viðtökurnar hafa verið framar okkar björtustu vonum og pöntunum rignir inn," segir Ása Þórdís Ásgeirsdóttir nemandi í frumkvöðlafræði við Fjölbrautaskóla Garðabæjar.

Slaufurnar hannaði Ása í félagi við skólasystur sínar, Irenu Sveinsdóttur, Hrafnhildi Heiðu Sandholt og Camillu Rut Arnarsdóttur. Slaufurnar tengja þær krabbameinsátakinu Mottumars, Karlmenn og krabbamein, og eru fyrir þá sem af einhverjum ástæðum ekki geta eða vilja safna yfirvaraskeggi en langar samt að leggja sitt af mörkum.

„Ég fékk þessa hugmynd fyrir tveimur árum síðan þegar kærastinn minn ætlaði að taka þátt í mottumars en var einfaldlega ekki með nógu gott yfirvaraskegg. Þá fattaði ég að það vantaði eitthvað fyrir þá sem geta ekki safnað skeggi," segir Ása en slaufurnar eru ætlaðar báðum kynjum og hitta vel á þar sem slaufur af öllum stærðum og gerðum eru einmitt í tísku þessa stundina.

Verkefnið er hluti af námi stúlknanna í frumkvöðlafræði en 9. mars næstkomandi fara þær með verkefnið í eins konar vörukeppni þar sem þær etja kappi við aðra framhaldsskóla. Slaufurnar hafa verið mjög vinsælar og gerðu stelpurnar ráð fyrir að selja margar fyrir árshátíð skólans sem fer fram í kvöld.

„Við erum að gera þetta í höndunum og sitjum sveittar við að sauma en það tekur um 20-30 mínútur að gera eina slaufu. Við erum byrjaðar að spá í að ráða saumakonu svo við náum að sinna öllum pöntunum og öðrum skólaverkefnum líka."

Hver slaufa kostar 2.500 krónur og af því renna 500 krónur beint til Krabbameinsfélagsins. Hægt er að nálgast frekari upplýsingar um verkefnið á Facebook-síðunni Arcos Slaufur en hægt er að leggja beint inn pöntun á póstfanginu arcos.ehf@gmail.com.

alfrun@frettabladid.is