Áform um virkjun í Stóru-Laxá

Landsvirkjun hefur farið fram á við Orkustofnun að fá rannsóknaleyfi vegna áætlana um virkjun í Stóru-Laxá í Hreppum. Hreppsnefnd Hrunamanna hefur engar upplýsingar um málið og hefur óskað eftir fundi með fyrirtækinu.

Það var Dagskráin – fréttablað Suðurlands sem sagði frá áformum Landsvirkjunar á fimmtudag. Um er að ræða virkjun með lóni og aðrennslisgöngum, alls um 20 megavött.

Ragnar Magnússon, oddviti Hrunamanna, segir í viðtali við Fréttablaðið að heimamenn hafi ekki heyrt af áformum um virkjun Stóru-Laxár fyrr en bréf barst nýlega frá Orkustofnun, en þar var óskað umsagnar hreppsnefndarinnar vegna óskar Landsvirkjunar um rannsóknaleyfi.

„Þetta kemur okkur afskaplega mikið á óvart og óskuðum við þess vegna eftir fundi með Landsvirkjun og Orkustofnun,“ segir Ragnar sem telur afskaplega ótrúlegt að heimamenn séu tilbúnir að skrifa undir stórtækar virkjunarhugmyndir á svæðinu. „Í mínum huga kemur aldrei til greina að gefa eftir Laxárgljúfrin eða framkvæmdir sem ógna laxastofninum í ánni.“ - shá