Fleiri eiga erindi til Lundúna

Í dag hefst Evrópumeistaramótið í 50 m laug en það fer fram í Debrecen í Ungverjalandi. Ísland sendir tólf sundmenn og -konur til þátttöku en langt er síðan að svo fjölmennt sundlandslið fer frá Íslandi á svo stórt mót.

Hópurinn var kynntur á blaðamannafundi fyrir helgi og þar var einnig samið við þjálfarann Jacky Pellerin um að gegna stöðu landsliðsþjálfara í fjögur ár í viðbót eða fram yfir Ólympíuleikana í Ríó árið 2016.

Pellerin, sem er franskur, hefur einnig starfað sem þjálfari hjá Sundfélaginu Ægi og mun gera áfram samhliða landsliðsþjálfarastarfinu. Hann hefur sinnt þeim störfum í nokkur ár og átt stóran þátt í því, ásamt Klaus Jürgen-Ohk, að marka skýra stefnu fyrir afreksfólk í sundi sem hefur borið góðan árangur.

„Ég hef frábæra tilfinningu fyrir þessu móti. Sérstaklega þar sem svo margir náðu EM-lágmörkum," sagði hann við Fréttablaðið. „Það gerir hverjum einstaklingi gott að vera í fjölmennum hópi. Hvatinn verður meiri og viljinn til að ná árangri sterkari."

Margir nálægt lágmarkinuAðeins Eygló Ósk Gústafsdóttir hefur náð OQT-lágmarki (gamla A-lágmarkið) fyrir Ólympíuleikana en aðeins besta sundfólk í heimi nær því. En sjö aðrir hafa náð OST-lágmarki (gamla B-lágmarkið) sem dugir þó ekki til að gulltryggja þeim keppnisrétt á leikunum.

„Ég á von á því að fjórir sundmenn muni ná OQT-lágmarki eða komast verulega nálægt því. Sarah Blake Bateman, Hrafnhildur Lúthersdóttir, Jakob Jóhann Sveinsson og Anton Sveinn McKee eru líkleg til þess en 1-2 til viðbótar gætu gert góða atlögu að lágmarkinu – eða þá synt nægilega vel til að komast í hóp 24 bestu sundmanna heims," segir Pellerin.

Þeir sem ekki ná OQT-lágmarki á EM fá annað tækifæri til þess á mótum á Spáni og í Frakklandi í byrjun júní. Takist það ekki heldur þá þurfa þeir sundmenn sem hafa aðeins náð OST-lágmarki að bíða þar til um miðjan mánuðinn er FINA, Alþjóðasundsambandið, birtir nöfn þeirra OST-sundmanna sem fá boð um þátttöku á leikunum í Lundúnum. Fyrirfram er mjög erfitt að spá um hvaða sundmenn muni fá boð.

Eygló gæti komist í úrslitSem fyrr segir er hin sautján ára Eygló Ósk sú eina sem hefur náð OQT-lágmarki en það gerði hún í 200 m baksundi. Pellerin, sem þjálfar hana einnig daglega hjá Ægi, segir að hún sé einfaldlega að uppskera árangur erfiðisins.

„Þetta kom ekki á óvart og hún getur leyft sér að stefna á að komast í undanúrslit og jafnvel úrslit í London," segir Pellerin.

„Ef hún kemst í úrslit þá eru hennir allir vegir færir því þá getur allt gerst. Ég fór fyrst sem þjálfari á Ólympíuleika árið 1992 og þá sá ég sundmann sem var í 21. sæti heimslistans (Eygló er í 24. sæti) komast á verðlaunapall. Það er allt hægt."

EM-hópurinnAnton Sveinn McKee, Ægi (19 ára)

400, 800, 1500 m skriðsund

Árni Már Árnason, ÍRB (25 ára)

50, 100 m skriðs., 100 m bringus.

Erla Dögg Haraldsdóttir, ÍRB (24 ára)

100, 200 m bringusund

Eva Hannesdóttir, KR (25 ára)

50, 100, 200, 4x100, 4x200 m skriðs.

Eygló Ósk Gústafsdóttir, Ægi (17 ára)

100, 200 m baks., 200, 4x200 m skriðs., 4x100 m fjórs.

Hrafnhildur Lúthersdóttir, SH (21 árs)

100, 200 m bringus., 4x100 m fjórs.

Ingibjörg Kristín Jónsdóttir, SH (19 ára)

50, 100 m skriðs., 50 m baks., 100 m skriðs.

Jakob Jóhann Sveinsson, Ægi (30 ára)

100, 200 m bringusund

Jóhanna Gerða Gústafsdóttir, Ægi (22 ára)

50, 100 m baks., 200, 4x200 m skriðs., 200, 400 m fjórs.

Ragnheiður Ragnarsdóttir, KR (28 ára)

50, 100, 4x100 m skriðs., 4x100 m fjórs.

Sarah Blake Bateman, Ægi (22 ára)

50, 100, 4x100, 4x200 skriðs., 50 m flugs., 4x100 m fjórs.

Sigrún Brá Sverrisdóttir, Ægi (22 ára)

400, 800 m skriðsund