Reyna við Íslandsmet í Salsa

„Við riðum á vaðið í fyrra og settum þá Íslandsmet sem við vonumst til að slá núna," segir Edda Blöndal, framkvæmdastjóri SalsaIceland, sem stendur fyrir hópdansi í Rueda de Casino á Austurvelli í dag.

78 manns tóku þátt í dansinum í fyrra, sem að sögn Eddu voru helmingi fleiri þátttakendur en þau höfðu þorað að vona.

„Það kom skemmtilega á óvart hversu margir mættu í fyrra. Við vitum því ekkert með hvurslags fjölda við megum reikna í ár en spáin er góð og stemningin sömuleiðis svo vonandi mætir fullt af fólki og hjálpar okkur að slá eigið met," segir hún. Hefð er fyrir metasetningum í Rueda de Casino-dansinum erlendis að sögn Eddu og þau því að fylgja alþjóðlega straumnum með því að reyna við þetta.

Öllum er velkomið að mæta á Austurvöll og taka þátt, en dansinn hefst klukkan 19. Hálftíma áður, eða klukkan 18.30, munu kennarar SalsaIceland standa fyrir ókeypis kennslu í grunnsporum dansins, sem er hringdans og hluti af kúbverskum salsadansi. „Þetta er einfaldur dans og jafnvel þeir sem hafa aldrei dansað áður geta komið og tekið þátt.

Þetta er líka fjölskylduskemmtun og fólk því hvatt til að taka krakkana með og koma og skemmta sér," segir Edda og bætir við að jafnvel þó fólk komi ekki til að dansa sé því samt velkomið að mæta á svæðið og taka þátt í stemningunni. „Thorvaldsen verður með þrusutilboð í gangi í tilefni þessa atburðar og svo verðum við með skemmtilega tónlist og mikið fjör," segir hún. - trs