Dansinn of vinsæll til að sleppa

„Dans Dans Dans mæltist svo vel fyrir í fyrra að við ákváðum að endurskoða ákvörðun okkar að taka þáttinn af dagskrá," segir Sigrún Stefánsdóttir dagskrástjóri Ríkissjónvarpsins sem þessa dagana er að leggja lokahönd á haust-og vetrardagskránna.

Athygli vakti er skemmtiþátturinn Dans Dans Dans, sem sýndur var í fyrravetur við góðar undirtektir, var tekinn af vetrardagskránni fyrir nokkru síðan en honum var svo bætt inn aftur. „Við ætluðum að gera þáttinn stærri umsvifum í ár og þegar við sáum fram á að geta það ekki kom upp sú tillaga að hætta við. Það var svo endurskoðað og þátturinn verður því með sama sniði og í fyrra," segir Sigrún en fyrsti þátturinn fer í loftið 6. október næstkomandi og áheyrendaprufurnar hefjast í byrjun september.

Þættir með Hemma Gunn, með nýju og gömlu efni, sem áttu að koma í staðinn fyrir Dans Dans Dans færast því yfir á föstudaga og hefjast 5.október.

Sigrún segir að helgarnar verði fjölskylduvænar hjá Rúv í vetur og einnig að dagskráin í ár beinist meira að ungu kynslóðinni en oft áður. Nýjir þættir dagskrágerðamannsins góðkunna Andra Frey Viðarssonar, Andri á flandri í Vesturheimum, verða forvitnilegir en þeir byrja einnig í byrjun október. Þá er Ísþjóð Ragnhildar Steinunnar Jónsdóttur á leiðinni aftur á skjáinn, sem og tónlistarþátturinn Hljómskálinn.

Rúv ætlar einnig að veðja á innlenda sem erlenda matreiðsluþætti með meistarakokkum á borð við Hrefnu Sætran, Yesmine Olsson og Svein Kjartansson í fararbroddi.

- áp