Elín Metta og Sandra María bættu met Margrétar Láru

Elín Metta Jensen og Sandra María Jessen tryggðu sér um helgina markadrottningartitilinn í Pepsi-deild kvenna og settu um leið nýtt met því aldrei hafa yngri leikmenn orðið markahæstar í efstu deild kvenna.

Báðir eru þær sautján ára gamlar og skoruðu hvor um sig átján mörk í átján leikjum í deildinni í sumar.

Þær stöllur bættu þar með báðar met Margrétar Láru Viðarsdóttur sem var átján ára gömul þegar hún varð markahæsti leikmaður úrvalsdeildar kvenna sumarið 2004. Margrét Lára skoraði þá 23 mörk í fjórtán leikjum með ÍBV. Margrét hafði þarna bætt tíu ára gamalt aldursmet Olgu Færseth um tíu mánuði en Olga varð markadrottning árið 1994.

Elín Metta spilaði 124 mínútur skemur en Sandra María í sumar og fær því gullskóinn en Sandra fær silfurskóinn í viðbót við það að verða Íslandsmeistari með Þór/KA.

Elín Metta er rúmum mánuði yngri en Sandra og eignast því auk gullskósins líka metið yfir yngstu markadrottningu úrvalsdeildar kvenna frá upphafi.

Það verður engin Margrét Lára í leikjunum við Norður-Íra og Norðmenn og því gæti íslenska landsliðið þurft að treysta á þessar ungu stelpur til að hjálpa liðinu að komast inn á EM næsta sumar.

Yngstu markadrottningar:

Elín Metta Jensen, Val 2012 (17 ára - 6 mánaða - 7 daga)

Sandra María Jessen, Þór/KA 2012 (17-7-21)

Margrét Lára Viðarsdóttir, ÍBV 2004 (18-1-11)

Olga Færseth, Breiðablik 1994 (18-11-3)

Margrét Lára Viðarsdóttir, Val 2005 (19-1-10)

Margrét Ólafsdóttir, Breiðabliki 1995 (19-2-2)

Ásta Benediktsdóttir, ÍA 1989 (20-0-30)

Margrét Lára Viðarsdóttir, Val 2006 (20-1-9)

Ásta B. Gunnlaugsdóttir, Breið. 1981 (20-3-8)

Ásthildur Helgadóttir, Breiðabl. 1996 (20-4-11)