Singh notaði hreindýrahornaspreyið ólöglega

Hreindýrahornasprey er tískuorð dagsins í íþróttaheiminum. Margir íþróttamenn hafa notað þetta efni en nú hefur komið í ljós að það inniheldur ólögleg efni.

Hreindýrahornaspreyið er framleitt af fyrirtækinu S.W.A.T.S. en það sérhæfir sig í vörum sem eiga að hjálpa íþróttamönnum á löglegan hátt. Sem sagt löglegur valmöguleiki í stað stera.

Í grein Sports Illustrated um daginn eru nokkrir íþróttamenn nafngreindir sem hafa verið að nota vörur fyrirtækisins. Þar kemur líka fram að í hreindýraspreyinu sé efni sem örvar vöðvavöxt. Ólöglegt efni.

Kylfingurinn Vijay Singh er á meðal þeirra sem eru nafngreindir í frétt SI og hann viðurkennir notkun sína á spreyinu. Segist þó ekki hafa haft hugmynd um að í því væri ólöglegt efni.

"Er ég notaði hreindýrahornaspreyið hafði ég ekki hugmynd um að þar gæti verið að finna efni sem er á bannlista hjá PGA. Ég las innihaldslistann og þar kom ekkert slíkt fram. Ég er í áfalli eftir að hafa komist að því að ég gæti hafa verið að nota ólöglegt efni. Ég hef haft samband við PGA vegna málsins og mun veita alla þá aðstoð sem ég get," segir í yfirlýsingu frá Singh.

Kylfingar á PGA-mótaröðinni voru varaðir við þessum vörum í mars árið 2011 en Singh læt þær aðvaranir sem vind um eyru þjóta.