Flottur hugmyndabíll Kia

Mikið er lagt í þennan tvinnbíl, alls 400 hestöfl og nóg af lúxusbúnaði.

Á bílasýningunni í Chicago sýndi Kia nýjan fjórhjóladrifinn hugmyndabíl, Cross GT Concept CUV. Hann er blendingur sem er nokkru stærri en Sorento jeppinn frá Kia og er með tvinnaflrás. Mikið er lagt í þennan bíl hvða varðar þægindi og rými og í honum má finna ýmsan lúxusbúnað. Útlitseinkenni bílsins er lítil slútun að framan og aftan en samt mikið hjólhaf. Bíllinn er ennfremur hábyggður og með sítengdu aldrifi.

Cross GT er með 3,8 lítra, V6 bensínvél og flatur rafmótor sem er undir gólfi bílsins. Samanlegt er afkastageta bílsins 400 hestöfl og togið ekkert smáræði eða alls 678 Nm. Bíllinn kemst 30 km eingöngu fyrir rafmagni en bíllinn mun verða með lágan koltvísýringsútblástur.

Samkvæmt upplýsingum frá Kia kemur fram að Cross GT sé náskyldur Sorento en ennþá stærri. Hjólahafið er 3,10 m, eða 40 cm lengra, og lengd bílsins er 4,90 metrar. Það hlýtur að koma að því að Kia taki þátt í markaðinum fyrir stærri SUV bíla og því eru líkurnar á því að þessi bíll fari í framleiðslu ágætir.