Dómarinn í sviðsljósinu fyrir El Clásico

Dómarinn í El Clásico í kvöld, Alberto Undiano Mallenco, hefur verið mikið malla tannanna á fólki fyrir leik kvöldsins. Það þykir ekki hafa verið góð ákvörðun að setja Mallenco á stórleikinn.

Barcelona tekur á móti Real Madrid í seinni leik liðanna í undanúrslitum bikarkeppninnar. Fyrri leikurinn fór 1-1.

Jordi Roura, sem leysir af sem þjálfari Barcelona, notaði blaðamannafundinn í gær til þess að senda Mallenco pillur en hann segir dómarann hafa farið illa með Barcelona í úrslitaleik bikarsins í fyrra. Sá leikur var gegn Real Madrid.

Real Madrid ætlaði sér aðeins að senda leikmann á blaðamannafundinn en þegar Jose Mourinho, þjálfari Real Madrid, heyrði af ummælum Roura ákvað hann sjálfur að mæta á fundinn.

"Okkur gengur verr þegar Undiano er á flautunni. Eina tapið okkar í deildinni í vetur var þegar hann dæmdi. Við höfum heldur ekki gleymt bikarleiknum. Það er best fyrir hann að láta sem minnst á sér bera í þessum leik," sagði Roura ákveðinn.

Mallenco hefur dæmt sex El Clásico-leiki. Barcelona hefur unnið þrjá, Real Madrid tvo og einu sinni endaði leikurinn með jafntefli. Hann hefur sent tvo leikmenn af velli í þessum leikjum, einn frá hvoru liði. Madrid hefur fengið 26 gul spjöld hjá honum og Barcelona 15.

Mourinho mætti á sinn blaðamannafund og gagnrýndi Barcelona fyrir að setja pressu á sína leikmenn.

"Sjálfur einblíni ég á þær kennslustundir sem ég hef fengið frá Barcelona. Þetta er frábært lið."