Ribery: Bestu leikmennirnir vilja koma til Bayern

Frakkinn Franck Ribery, leikmaður Bayern München, segir að sitt félag sé komið í þá stöðu að geta keppt við Barcelona, Real Madrid og önnur stór félög um stærstu bitana á leikmannamarkaðnum.

Bayern hefur allt gengið í haginn í vetur og er líklegt til mikilla afreka.

"Bayern hefur alltaf verið Bayern. Hér áður fyrr vildu bestu leikmennirnir fara í stóru liðin á Spáni og til Englands. Núna finnst mér að það sé að breytast og að þessir menn vilji koma til Bayern," sagði Robery kokhraustur.

"Sú staðreynd að við höfum komist í úrslit Meistaradeildarinnar tvisvar á síðustu þremur árum segir sína sögu."

Ribery kom til félagsins frá Marseille sumarið 2007.