Hvernig væri að baka þessa dásamlegu skúffuköku?

Þórdís Þorleifsdóttir sem er ein af skipuleggjendum Lífstöltsins í ár sem fram fer í reiðhöll hestamannafélags Harðar í Mosfellsbæ næsta laugardag gefur okkur uppskrift af dásamlegri súkkulaðiköku sem er tilvalið að baka á sunnudegi sem þessum.

Uppáhalds skúffukaka Þórdísar

4.5 dl. hveiti

4 dl. sykur

175 g brætt smjörlíki eða smjör (eða 50/50)

2 stór egg eða 3 lítil

1/2 tsk. lyftiduft

1 dl. Cadbury´s kakó, eða annað bökunarkakó

1 tsk. matarsódi

1 tsk. salt

2 tsk. vanillusykur

1 tsk. vanilludropar

2 dl. ab mjólk, hrein

1 1/2 dl. kalt vatn



Bræða smjörlíki við vægan hita. Setja allt hráefnið í skál, svo smjörið í lokin og hræra saman. Gott að sigta kakóið útí.

Baka við 150 gr. blástur eða 170 við undir og yfir hita. Bakið í 35 til 40 mín. Fer svolítið eftir ofnum. Passar í gott skúffukökuform. Ef þið viljið setja í heila ofnbökunarskúffu þá er gott að tvöfalda uppskriftina.

Krem

150 gr. íslenskt smjör (mjúkt)

150 gr. flórsykur

1 eggjarauða

2 msk. kakó (bökunar)



Allt sett saman í hrærivél og hrært til mjúkt og samlagað. Gott að dreifa grófu kókosmjöli yfir.

Hér má lesa meira um Lífstöltið sem er til styrktar LÍFI styrktarfélagi kvennadeildar Landspítalans.