Valskonur tryggðu sér sæti í úrslitakeppninni

Kvennalið Vals tryggði sér sæti í úrslitakeppninni með því að vinna fjögurra stiga sigur á deildarmeisturum Keflavíkur, 96-92 í Vodfone-höllinni í kvöld. Valsliðið endar í fjórða sæti deildarinnar sama hvernig fer í lokaumferðinni.

Keflavíkurkonur hafa þar með tapað báðum leikjum sínum síðan að þær tryggðu sér deildarmeistaratitilinn á dögunum því þær töpuðu fyrir KR á laugardaginn var.

Keflavík og Valur munu mætast í undanúrslitum úrslitakeppninnar en liðin léku einnig til úrslita í bikarkeppninni. Keflavík vann bikarúrslitaleikinn en Valur hefur unnið báða deildarleiki liðanna eftir áramót.

Kristrún Sigurjónsdóttir skoraði 26 stig fyrir Val í kvöld og Jaleesa Butler var með 16 stig, 13 fráköst og 9 stoðsendingar. Ragna Margrét Brynjarsdóttir átti einnig mjög góðan leik en hún var með 18 stig og 14 fráköst í kvöld.

Pálína Gunnlaugsdóttir skoraði 24 stig fyrir Keflavík og Sara Rún Hinriksdóttir var með 23 stig og 10 fráköst en Keflavíkurliðið lék án Birnu Valgarðsdóttur í kvöld.

Valskonur lögðu grunn að sigrinum með frábærum fimm mínútna kafla í kringum leikhlutaskiptin í þriðja og fjórða leikhluta en Valsliðið vann þessar fimm mínútur 20-4 og breytti stöðunni úr 53-61 í 73-65.

Keflavíkurkonur komu til baka í lokin en náðu ekki að vinna upp muninn og Valskonur fögnuðu sigri og öruggu sæti í úrslitakeppninni.

Valur-Keflavík 96-92 (50-50)

Valur: Kristrún Sigurjónsdóttir 26, Hallveig Jónsdóttir 19, Ragna Margrét Brynjarsdóttir 18/14 fráköst, Jaleesa Butler 16/13 fráköst/9 stoðsendingar/3 varin skot, Ragnheiður Benónísdóttir 8/4 fráköst, Unnur Lára Ásgeirsdóttir 5/4 fráköst/6 stoðsendingar, Þórunn Bjarnadóttir 2, María Björnsdóttir 2.

Keflavík: Pálína Gunnlaugsdóttir 24/5 stolnir, Sara Rún Hinriksdóttir 23/10 fráköst/3 varin skot, Jessica Ann Jenkins 14, Bryndís Guðmundsdóttir 10/6 fráköst, Ingunn Embla Kristínardóttir 8, Ingibjörg Jakobsdóttir 7, Sandra Lind Þrastardóttir 6.