Valur í undanúrslitin

Nú er ljóst hvaða lið mætast í undanúrslitum úrslitakeppni N1-deildar kvenna. Valur tryggði sæti sitt eftir sigur á Haukum í Hafnarfirði í dag, 32-21.

Sigur deildarmeistara Vals var öruggur en staðan var 14-9 í hálfleik, Val í vil. Valur vann því rimmu liðanna 2-0.

Fram, ÍBV og Stjarnan tryggðu sér sæti í undanúrslitunum fyrr í dag en öllum rimmunum í fjórðungsúrslitunum lauk 2-0.

Dagný Skúladóttir skoraði ellefu mörk fyrir Val í dag og Þorgerður Atladóttir níu. Marija Gedroit skoraði sex mörk fyrir Hauka og þær Viktoría Valdimarsdóttir og Karen Helga Sigurjónsdóttir fimm hvor.

Undanúrslitin hefjast á föstudagskvöldið. Valur mætir Stjörnunni en Fram leikur gegn ÍBV. Þrjá sigra þarf til að komast áfram í lokaúrslitin.