Zidane á að fá Bale til Real Madrid

Real Madrid hefur haft það á stefnu sinni í áraraðir að kaupa bestu leikmenn heims. Ekki á að hverfa frá þeirri stefnu og efstur á blaði félagsins í dag er Walesverjinn Gareth Bale sem spilar fyrir Tottenham.

Zinedine Zidane, fyrrum hetja Real, er að starfa fyrir félagið og honum hefur verið úthlutað það verkefni að fá Bale til félagsins. Það ku vera það eina sem skiptir máli fyrir Real í sumar - að fá Bale.

Real er sagt vera til í að greiða háa fjárhæð fyrir Bale. 65 milljónir punda hefur verið nefnt í því sambandi en erfitt yrði fyrir Tottenham að hafna slíku tilboði.

Zidane er mikill aðdáandi Bale og hefur oft talað vel um Walesverjann.

"Ég hef verið að horfa á Tottenham til þess að sjá Bale spila. Fyrir utan Ronaldo og Messi er Bale mest spennandi leikmaður heims í dag. Hann er frábær," sagði Zidane.

Frakkinn Zidane hefur komið að nokkrum félagaskiptum til Real síðan árið 2006 er hann lagði skóna á hilluna.