Olía fundin á Vigdísi

Olíustofnun Noregs hefur tilkynnt að Statoil hafi komið niður á olíu á svæði sem kallast Vigdís í norðurhluta Norðursjávar. Eftir er að meta stærð olíulindarinnar og hvort hún reynist arðbær til vinnslu. Samkvæmt fréttatilkynningu Olíustofnunarinnar eru vísbendingar um að gæði olíunnar séu minni en vonast var til.

Borpallurinn Bideford Dolphin boraði holuna í norðausturhluta Vigdísar-svæðisins, sem liggur milli olíusvæða sem kennd eru við Gullfaxa og Snorra. Hafdýpið er nærri 300 metrar og var borað 2.500 metra niður í hafsbotninn. Fimm olíufélög stóðu að boruninni, auk Statoil eru það ExxonMobil, Petoro, Idemitsu og RWE Dea.

Olía fannst fyrst á Vigdísi árið 1986 og hófst olíuvinnsla þar árið 1997. Engir vinnslupallar eru á svæðinu heldur er olíunni dælt upp með neðansjávarbúnaði og hún síðan flutt með leiðslum á hafsbotni yfir til Snorrasvæðisins. Hafsvæðið er djúpt út af Sognfirði og Dalsfirði, þaðan sem Ingólfur Arnarson landnámsmaður sigldi til Íslands.