Annis með sigurmark Íslandsmeistaranna

Þór/KA vann nauman 1-0 sigur á Aftureldingu í lokaleik 7. umferðar Pepsi-deildar kvenna í knattspyrnu í dag.

Íslandsmeistararnir höfðu yfirhöndina í leiknum en gekk illa að koma boltanum í netið. Það var loks á 70. mínútu sem það tókst. Lára Einarsdóttir sendi þá fyrir markið frá hægri á kollinn á Tahnai Annis sem skallaði knöttinn glæsilega í netið.

Íslandsmeistararnir héldu forystu sinni út leiktímann og lönduðu dýrmætum sigri.

Með sigrinum kemst Þór/KA upp að hlið Valsmanna í 4. sæti deildarinnar með ellefu stig. Afturelding er hins vegar í 10.-11. sæti ásamt HK/Víkingi með fjögur stig.