S-Class ofurútgáfa í stað Maybach

Daimler, móðurfyrirtæki Mercedes Benz, lagði niður lúxusbílamerkið Maybach í fyrra eftir að hafa reynt að blása lífi í þetta ríflega 100 ára gamla bílamerki, en án árangurs.

Daimler hafði ætlað Maybach að keppa við Bentley og Rolls Royce um seðla ríkustu bílakaupendanna og kostuðu bílar Maybach allt að 470.000 dollara, eða 57 milljónir króna. Kaupendum Maybach fór sífellt fækkandi og eina ráð Daimler var að leggja niður merkið.

Svo Daimler geti nú áfram keppt á markaði fyrir dýrari lúxusbíla ætla þeir að tefla frekar fram ofurútgáfu S-Class bílsins og munu fyrstu bílarnir koma á markað árið 2015 og þá af 2016 árgerð.

Munu þeir kosta á bilinu 200-250.000 dollara, eða 24-30 milljónir króna. Það verð er á pari við ódýrari gerðir Bentley og Rolls Royce, en það sem Mercedes Benz telur sig hafa fram yfir keppinautana verður meiri búnaður og tækni sem í boði verða í þeirra nýju bílum.