Neglurnar hennar Ásdísar í fánalitunum

Ásdís Hjálmsdóttir, eini íslenski keppandinn á HM í frjálsum í Moskvu, hóf og lauk keppni í morgun þegar hún varð í 21. sæti í undankeppninni í spjótkasti kvenna. Ásdís kastaði lengst 57,65 metra og var tæpum þremur metrum frá því að komast inn í úrslitin.

Neglur keppanda á HM hafa verið í umræðunni síðustu daga eftir að sænski hástökkvarinn Emma Green-Tregaro mætti til leiks með neglur sínar málaðar í öllum regnboganslitum.  Hún var með því að mótmæla nýjum lögum í Rússlandi sem banna homma og lesbíur.

Ásdís mætti til leiks í morgun með málaðar neglur en hún sleppti því þó að mála þær í í öllum litum regnbogans eins og sú sænska. Hún var hinsvegar með sínar neglur í íslensku fánalitunum eins og sjá má á þessari skemmtilegu AFP-mynd hér fyrir ofan.

Það hefur tekið Ásdísi örugglega góðan tíma í að mála neglurnar sínar fyrir keppnina en þær vöktu það mikla athygli að þær rötuðu inn í myndabanka AFP-fréttastofunnar.