Langstökkseinvígi í Kaplakrika í kvöld

Ellefta mótaraðarmót Frjálsíþróttasambands Íslands fer fram í Kaplakrika í Hafnarfirði í kvöld og þar bíða margir spenntir eftir einvígi Hafdísar Sigurðardóttur og Sveinbjargar Zophoníasdóttur eins og fram kemur í frétt á heimasíðu FRÍ.

Það er búist við mikilli spennu í langstökkinu enda má líta á þetta sem einvígi okkar besta langstökkvarapars í kvennaflokki frá upphafi en sú keppni byrjar kl. 18:00.

Í langstökkskeppninni mætast þær Hafdís Sigurðardóttir (UFA) Íslandsmethafi  (6,36 metrar) og Sveinbjörg Zophoníasdóttir (FH) methafi í flokki 20-22ára (6,27 metrar) en þær gera báðar tilkall til þess að vera bestu langstökkvara Íslandssögunnar.  

Sveinbjörg bætti árangur sinn í sjöþraut verulega í sumar og er í fínu formi og Sveinbjörg hefur farið mikinn í sumar og jafnað Íslandsmet sitt í tvígang á þessu ári. Metið átti Sunna Gestsdóttur sem var 6.30 metrar og var sett á Möltu 2003.

Hilmar Jónsson mun kasta karlasleggjunni í Kaplakrika í kvöld og þar mun hann freista þess að bæta nýlegt Íslandsmet sitt með karlasleggjunni sem var kast upp á 60,98 metra. Sá árangur kom honum á topp evrópska listans í sleggjukasti (með 7,26 kg sleggju) í flokki 17 ára pilta. Sleggjukastið hefst klukkan 20.00.