Faroe Petroleum og Statoil finna olíulind í Noregshafi

Norska olíufélagið Statoil og Faroe Petroleum, sem Færeyingar stofnuðu árið 1997, tilkynntu í morgun um þau hefðu fundið nýja olíulind við vesturströnd Noregs. Stærð hennar er áætluð milli 60 og 100 milljónir olíutunna. Olíulindin er í hafinu út af Þrændalögum, norðvestur af Þrándheimi, og norðan Kristiansunds, á svokölluðu Snilehorn-svæði. Borpallurinn Songa Trym boraði brunninn niður á 3.400 metra dýpi.

„Við erum mjög ánægð með árangurinn af leitaráætlun okkar á svæðum nærri vinnslusvæðum okkar í Noregshafi,“ hafa norskir fjölmiðlar eftir leitarstjóra Statoil, Gro G. Haatvedt. Hún segir að á þremur mánuðum hafi olía fundist á þremur nýjum svæðum í kringum vinnslusvæðin Norn, Ásgarð og Njörð. Þetta sé mjög verðmæt olía í háum gæðum og gefi Statoil möguleika á að framlengja líftíma fjárfestinga sinna þarna.

Olíufundinum hefur einnig verið fagnað í Færeyjum. Færeyskir netmiðlar hafa eftir forstjóra Faroe Petroleum, Graham Stewart, að þetta sé verulegur fundur, og sá annar á þessu ári sem félagið tengist í Noregshafi. Faroe á 7,5% hlut í olíulindinni, Statoil 35%, GDP Suez 20%, E.ON 17,5%, Core Energy 17,5% og VNG á 2,5%.

Þess má geta að Faroe Petroleum er handhafi 67,5% hlutar í sérleyfi á íslenska Drekasvæðinu. Forstjóri Faroe sagði við úthlutun þess í Reykjavík í byrjun þessa árs að hann gerði ráð fyrir að olíuframleiðsla á landgrunni Íslands gæti hafist eftir sjö til átta ár og fyrsti borpallurinn kæmi eftir þrjú til fjögur ár.