Styrmir Dan hátt uppi um helgina

Styrmir Dan Hansen Steinunnarson stökk 1,90 metra á Aðventumóti Ármenninga í Frjálsíþróttahöllinni í Laugardal um helgina. Stökkvarinn 14 ára sló tvær flugur í einu höggi með glæsilegu stökki sínu.

Styrmir Dan, sem keppir fyrir Þór í Þorlákshöfn, bætti sinn besta árangur um heila 10 cm með stökkinu sem sjá má í myndbandi Silfursins í spilaranum hér að neðan. Um leið bætti hann bæði Íslandsmetið í hástökki innanhúss í flokki 14 ára og yngri og 15 ára og yngri.

Styrmir Dan stökk 1,86 metra í þriðju tilraun og var ráin þá hækkuð í 1,90 metra. Þorlákshafnarbúinn gerði sér lítið fyrir og fór yfir hæðina í sinni fyrstu tilraun.

Metið í 14 ára flokknum var í eigu Þrastar Ingvarssonar og hafði staðið afar lengi eða í 28 ár. Metið í 15 ára flokknum var hins vegar í eigu Stefáns Þórs Stefánssonar og hafði staðið í heil 35 ár.

Styrmir Dan er afar efnilegur hástökkvari og hefur bætt sig mikið á árinu sem senn er á enda. Hans besti árangur utanhúss er 1,78 metrar en ljóst er að hann er líklegur til að bæta sig þar næsta sumar. Til samanburðar stökk Íslandsmethafinn Einar Karl Hjartarson hæst 1,75 metra utanhúss þegar hann var á fjórtánda ári.

Þá kemur fram í umfjöllun Silfursins um mótið að að Patrik Sjöberg hafi stokkið 1,91 metra á fjórtánda ári. Svíinn varð síðar heimsmeistari og heimsmethafi í greininni. Hans hæsta stökk var 2,42 metrar.

Stefán Þór Stefánsson, fyrrverandi handhafi metsins í flokki 14 ára innanhúss, tók saman skemmtilegt myndband til heiðurs Styrmi. Myndbandið má sjá hér að neðan. Stefán er enn handhafi utanhússmetsins og hvetur Styrmi, í góðlátlegu gríni, til að skella sér til Ástralíu áður en árið er úti og bæta utanhússmetið sitt líka.